吃喝玩樂

一齊去滾
嚴選任食甌爐

巴絲打4個月之前發表

香港人一年四季都會打甌爐,貪佢未齊人可以食住等,又可以食一陣停一陣同朋友吹吓水。秋冬更加係打甌爐嘅旺季,天口咁涼有得任食固然好,但抵食先至真正吸引,就等我哋為大家將以下三間任食甌爐分出高下!
一鍋兩味 富臨酒家
打咗咁多年甌爐,大家開始追求各種變化,早十年八年流行食豬骨煲,而近兩三年就流行食雞煲,先食晒煲入面啲雞,然後先加湯打甌爐。雞煲甌爐隻雞通常係另外計錢嘅,亦有部份按人頭俾唔同份量嘅雞。而家富臨酒家嘅任食甌爐亦有雞煲俾你揀,仲可以轉胡椒豬肚或者醉雞煲,一律唔使另外加錢,都叫做追得上潮流。富臨分咗兩個時段,由17:30至21:00入座, 每位$128唔使加一,冇錯,$128已經找到數!如果21:00後入座再平$10,以旺角區嚟講呢個價錢真係冇得輸!

幾平都好,嘢食最緊要。筆者唔食辣,所以個雞煲叫咗小辣。大部份雞煲小辣都冇大辣咁香,而富臨呢個小辣得嚟啲雞都算幾入味,甚至比唔少標榜雞煲為主嘅火鍋店更好食,呢吓真係估佢唔到。不過,食完個雞要求加湯,佢竟然係加淨滾水,扣唔少分。

收得呢個價,啲火鍋料都唔會令人好大期望,不過勝在唔會得返十款八款焗你食,選擇都算多,始終都會搵到一啲OK嘅食材,例如個鵝腸最令筆者喜出望外,味道濃郁,只係唔夠爽口,都值得翻嗌。而其他筆者試食過嘅配料都未至於衰到唔入得口 ,呢個價錢嚟講接受到。有部份啤酒提供任飲值得一讚,唔只得汽水,係今次測試唯一一間,如果朋友當中好多都鍾意飲啤酒嘅,呢間即刻吸引好多。

呢間嘢堅係抵食到爆晒燈!而且食物品質又唔算差,另外要讚一讚試食當日員工整體態度都好好,個個有講有笑,任食火鍋店好少有。富臨旺角店閒日唔會點爆滿,有時如果肚餓到爆唔等得要即刻食,值得上去睇睇!

肥牛算不過不失

火鍋料炒埋一碟咁上,雖然唔好睇,但質素唔算差

指定啤酒都係任飲

啲醬料……好彩質素都唔錯
性價比爆燈 大鍋口海鮮火鍋店
大鍋口暫時只有三間分店,老實講,筆者之前只係聽過一眾甌爐精朋友極力推薦,而家終於親身品嚐一次。呢間甌爐店果然非常旺場,閒日七點上到去旺角店,門口已經逼爆,只好問吓門口阿姐可唔可以book擡啦,點知佢竟然唔志在做你生意咁回應要book三、四個星期之後,真係串到爆!不過人總係犯賤嘅,就好似明知去到澳牛叫慢少少都會俾侍應鬧,大家都仲係死都要去食一樣。筆者一行人第二日就特登去排咗粒幾鐘,直至宵夜時段先入到去。晚市正價$168,宵夜$148,但因為已經由好餓等到唔太餓,平咗廿雞都唔特別興奮鳥。

湯底除咗沙爹、皮蛋莞茜、蕃茄呢啲例牌嘢,仲有胡椒豬肚、冬蔭公、鯊魚骨、 魚頭湯揀。四川麻辣要加錢幾新奇,鍾意食勁辣嘅朋友要諗諗,而更特別係竟然有清湯牛腩鍋,一於揀佢!個湯牛腩唔算好多,但好腍同幾濃味,湯本身仲幾香蘿蔔味,可惜偏淡,整體計算係中上啦!

火鍋料呢間嘢真係唔講得笑。款式多,而且差不多可以話樣樣覯料,如果唔係自己親身試過,真係唔可以相信呢個價錢可以畀到咁有質素嘅嘢食你。當中嘅「是日海鮮」唔可以唔叫,日日都有貴貴哋嘅海鮮選擇,筆者試食當日就係花甲,大隻又鮮味。香港人打甌爐最愛嘅肥牛個款亦係三間之中最靚,但係冇乜牛味。佢哋亦有提供另外俾你加錢更靚嘅牛,但筆者覺得其實任食嘅料已經好夠,反正你叫乜返嚟都會有一定水準。任飲嘅汽水由可口可樂公司提供,而唔係百事,最啱可樂精,酒精類就要另外俾錢喇。

計食物質素,大鍋口喺同價中之絕對超晒班,難怪好多人特登等兩三個鐘都要幫襯。不過筆者個人唔buy要等咁耐位,呢點就要扣返啲分,當然呢啲完全係個人偏好,如果有死士肯消耗呢啲時間,其實都真係好唔錯。

手切肥牛都係任食,但冇乜肉味

其他料又多款又靚,而且最緊要嚟得夠快

可口可樂任飲,仲有忌廉奶

叫個即食麵都會畀包出前一丁你,問你死未!?
自由升級 德興火鍋海鮮酒家
德興價錢除返開貴另外兩間好多,而且只送一杯酸梅湯,冇得任飲。一坐低佢就拎咗盤刺身過嚟,有三文魚、 墨魚、北寄貝、帶子、熟蝦,每人每樣一件, 質素屬不過不失。至於湯底,只有小部分要另外加錢,免費嘅選擇都好多,當中比較特別嘅包括胡椒海鮮、螺頭湯同雪梨蘋果湯。今次一半爐友好辣一半唔好,所以揀咗個清湯配麻辣鴛鴦鍋。聽辣友講個麻辣好爽,其中一位中途更加要轉食清湯,似乎真係幾堅,鍾意食辣嘅朋友可以諗諗。

德興有得免費任食嘅火鍋料明顯比前面兩間少,好多成本較高嘅食材都要另外畀錢,但勝在選擇算幾多。除咗貴價和牛,仲有海螺、桂花蚌、珊瑚蚌、龍蝦甚至海斑。任食食材質素中規中矩,唔算得上差但又冇乜驚喜。飲品方面唔係任飲,最平有$18三罐可樂,都唔算好過份。另外,醬料都唔係任點,想要豉油以外嘅醬料要每位再收$9(加埋一即係$10),雖然款式堅多,但感覺都係俾人硬屈。

德興身為任食甌爐店,好多方面都未必比得上另外兩間•筆者兩個月前食過嘅觀塘店同樣咁上下質素。德興比較著重自選收費食材同服務•似乎係想做得比對手高級少少,但效果點樣真係見仁見智。

肥牛同羊肉都捲住上,睇落高級啲

一坐低就上刺身,呃得吓人

火鍋料外表見得人,只係款比較少

醬料選擇夠多,只係咁又要屈人$10
總結:
市面任食火鍋林林總總,今次同大家試食嘅三間可以話係各走極端:富臨平得嚟質素可接受,大鍋口質素高而價錢低;德興適合招呼朋友見得吓人。筆者自己最鍾意富臨,唔單只因為價錢,亦因為佢唔會太多人,唔使等餐死(閒日計),服務態度又OK。有時成班friend圍埋食嘢都係想開開心心,以上幾點絕對符合令大家心情愉快嘅基本要求。

相關文章

更多文章

自製「呃like」圖小貼士

 資料由客戶提供 於 4小時之前發表

社會進入數碼化的年化,事無大小都可透過社交媒體發佈,除了人人會在Facebook、IG 等社交平台出文分享自己每天瑣事,更有不少中小企業開設Fan page,紛紛將廣告 / 資訊投...

詳細閱讀

X-Force導演已定!夥拍賴恩雷諾士寫劇本

 航仔 於 20小時之前發表

《死侍:不死現身》成績超卓,間接幫Fox開拓出一條有別於《變種特攻》嘅新路向,而其中一套就係有關變種人傭兵軍隊X-Force嘅電影。據ComicBook.com消息來源透露,呢套未...

詳細閱讀

雅軒帶大家去試自炒大阪燒

 雅軒 於 21小時之前發表

食、玩、瞓係人生最重要三大元素,當中瞓就冇乜可能同其他嘢一齊做,不過講到食同玩,好多時都同可並肩而行。今次雅軒就同大家去一間又可以食又可以玩嘅食店,齊齊玩住咁自製大阪燒。......

詳細閱讀

《NieR:Automata》繁中多版本4/27上市!

 女漢子 於 22小時之前發表

近排遊戲台唔少巴打都討論緊《NieR:Automata》呢隻PS4 game,好消息除咗有今日發布嘅體驗版「DEMO 120161128」繁中...

詳細閱讀

你個芒又係2:1 QHD+?
Evan Blass透露S8+規格

 女漢子 於 1日之前發表

上次Evan Blass列晒Galaxy S8規格,今朝佢又有新嘢開心share,就係S8+規格喇。畢竟係同一系列,其實睇咗S8單料唔多唔少估到,之不過意想不到S8+同LG G6一...

詳細閱讀

【等睇Apple跟機】外國網推58色自訂AirPods服務

 女漢子 於 1日之前發表

揀保護套都要諗吓夾唔夾手機機身顏色,耳機襯埋色做一套都應份,iPhone就未必有呢支歌唱喇,因為AirPods暫時只提供白色。ColorWare宣布推出AirPods自訂上色服務,...

詳細閱讀