吃喝玩樂

【超邪惡流心狗糧】
日本直送士多啤梨蛋糕炒麵食評

女漢子9日之前發表

是咁的,相信有去開韓日食品店或者熟悉日本嘅巴絲,都會聽過明星食品出產嘅「一平夜店炒麵」。正常味道係好食嘅,但佢哋非常鍾意製作特殊口味,就好似上月新出嘅草莓蛋糕味。筆者身先士卒托人帶咗盒返嚟試食,一放入口心諗:「我究竟食乜X……」
呢盒麵味道正式名叫Shortcake(ショートケーキ),即係我哋叫開嘅水果忌廉蛋糕。唔使開封淨係望住包裝右上角張相,雲呢拿味蛋黃醬溝士多啤梨乾再溝彩虹條,加上不明白色顆粒,睇圖都知伏味濃。開封後蓋紙有清晰圖解食用指示,唔識日文亦問題不大,不過有個問題:冇叉用,要自備。盒內總共有三包配料,分別係底味醬汁、疑似雲呢拿味嘅白色蛋黃醬同乾料。

包裝紙右上角參考圖令人不安

蓋紙有晒圖同1、2、3,冇理由唔識焗呀?

(左起)超邪惡蛋黃醬、底味醬汁、乾料

包乾料有士多啤梨乾、彩虹條同白色糖粒
跟著落嚟同平時食炒麵王做法差唔多,落滾水到刻線位焗3分鐘、倒水,撈料食得。值得一讚係佢個開倒水位冇香港啲咁慳皮,設計好又實淨,將成盒麵180度倒轉,半條麵都冇瀉出嚟,勁!打開個蓋啲麵味湧出嚟,份量比想像中多,感覺真材實料,不愧係日本出品

落滾水到刻線位

出水位個設計好好,香港應該學習吓

開封,啲麵真係好香
之後落醬先係戲肉,嗰包藍色醬汁係糖漿嚟架喎大佬!抱著必死嘅覺悟開包白色醬汁,聞落冇頭先咁嚴重,但唧落去噁心指數要畀10分,灑埋包乾料就大功告成,好想即刻倒落廁所。掙扎完一輪,撈兩嘢放入口,首先襲來一陣老麥熱香餅餐糖漿甜味,夾雜少少鹹味,忽然又食到滑潺潺嘅白色醬汁,然後係脆口嘅士多啤梨乾同白色粒粒(食完到而家都唔知佢咩嚟,忌廉乾?)。同一時間3隻味、4種口感喺口腔內交戰,完全分唔清自己食緊甜品定炒麵。雖則盒麵未至於難食到嘔,但再戰?不了。補充一點:啲白色醬汁唔多夠,食到底得番糖漿同鹹味,劣食層次感會高啲。

先落糖漿…成陣化學甜味攻上鼻

然後係雲呢拿味蛋黃醬

整張超近鏡畀大家睇,係咪好衝擊呢?

加乾料,提高成個麵色彩層次

完成品都幾似封面圖

本著不要浪費食物嘅精神,頂硬上食清光
【仿製狗糧】自製香港山寨加強版
對劣食情有獨鍾嘅巴絲如欲跟機,又無法自己買或請朋友仗義入貨,喺度提供個折衷方案畀你:老麥糖漿+士多啤利新地+淨炒麵王,唔使落晒全部嘅,每樣落少少就夠。劣化糖漿加上人造士多啤梨醬同雲呢拿,衝擊程度比起士多啤梨忌廉蛋糕麵有過之而無不及,試食一啖直頭想嘔。好彩冇乜aftertaste,隻味快來也快去,飲幾啖水走七成,唔似得蛋糕麵咁要飲兩杯茶先散得走一半,如果食完唔記得洗手,隻味留喺手指頭足足一個鐘,感覺幸福美滿。

集齊三樣神器

個樣核突過正版,隻味都係
【預告】一平夜店炒麵朱古力醬2017版
利申,筆者冇自虐傾向,但今個月新出嘅「一平夜店炒麵朱古力醬2017版」將繼續以友情托運方式月底抵港,到時會做死士食多次。筆者曾親身現場睇朋友示範食舊版本,聞到隻味即刻彈開三呎走避,高lv過士多啤梨忌廉蛋糕,有興趣嘅巴絲敬請留意。

相關文章

更多文章

《G.I. Joe 3》原本會同《變形金剛》crossover

 航仔 於 1小時之前發表

《義勇群英》(G.I. Joe)同《變形金剛》都係由暢銷玩具系列變成動漫主角,兩者均由孩之寶擁有,佢哋嘅漫畫與玩具曾經多次crossover,曾獲聘執導《義勇群英3》導演D.J. ...

詳細閱讀

DC都有Captain Marvel!
電影版搵狄維莊遜做反派

 航仔 於 20小時之前發表

《Captain Marvel》早前宣布拍成電影,由影后貝兒娜森飾演,但原來呢位角色並非Marvel獨有,DC漫畫其實都有另一位超級英雄叫Captain Marvel(後來易名為S...

詳細閱讀

《盧根》最終預告出爐
導演解釋故事時間設定

 航仔 於 20小時之前發表

《盧根》第二段預告噚日出爐,依然貫徹首段預告荒涼而貼近真實嘅風格,並確定神秘女孩係X-23。片中X教授同狼人躲藏於墨西哥邊境,同《變種特攻:未來同盟戰》充滿希望嘅結尾相去甚遠,但兩...

詳細閱讀

聞住火藥味、體香打機
VAQSO推出VR氣味配件

 女漢子 於 21小時之前發表

VR眼鏡搭住體感控制器同耳機可以提供虛擬視聽感受,日本公司VAQSO希望補充番嗅覺,計劃生產一款VR氣味配件,因應遊戲情節釋放出不同氣味。......

詳細閱讀

新年手機電腦大掃除!
由內至外清走污漬垃圾

 編輯部 於 22小時之前發表

臨近年廿八,傳統上係咁意都要同屋企大掃除,但叫得大掃除梗係要滴水不漏,現代人生活必需品——手機、電腦自然唔應該放過。高登編輯部將大掃除分為硬件同軟件兩個部分,精選出幾個整理方法供各...

詳細閱讀

首批Nokia 6一分鐘內完售!
18.4吋平板輪候登場?

 女漢子 於 23小時之前發表

噚日Nokia 6於中國京東商城開賣,粒S430 CPU並唔係十分吸引,但一分鐘之內仍然被大批死忠如狼似虎咁買晒。GFXBench家吓出現咗部S835 Nokia平板,連尺寸都係旗...

詳細閱讀