吃喝玩樂

【超邪惡流心狗糧】
日本直送士多啤梨蛋糕炒麵食評

女漢子4個月之前發表

是咁的,相信有去開韓日食品店或者熟悉日本嘅巴絲,都會聽過明星食品出產嘅「一平夜店炒麵」。正常味道係好食嘅,但佢哋非常鍾意製作特殊口味,就好似上月新出嘅草莓蛋糕味。筆者身先士卒托人帶咗盒返嚟試食,一放入口心諗:「我究竟食乜X……」
呢盒麵味道正式名叫Shortcake(ショートケーキ),即係我哋叫開嘅水果忌廉蛋糕。唔使開封淨係望住包裝右上角張相,雲呢拿味蛋黃醬溝士多啤梨乾再溝彩虹條,加上不明白色顆粒,睇圖都知伏味濃。開封後蓋紙有清晰圖解食用指示,唔識日文亦問題不大,不過有個問題:冇叉用,要自備。盒內總共有三包配料,分別係底味醬汁、疑似雲呢拿味嘅白色蛋黃醬同乾料。

包裝紙右上角參考圖令人不安

蓋紙有晒圖同1、2、3,冇理由唔識焗呀?

(左起)超邪惡蛋黃醬、底味醬汁、乾料

包乾料有士多啤梨乾、彩虹條同白色糖粒
跟著落嚟同平時食炒麵王做法差唔多,落滾水到刻線位焗3分鐘、倒水,撈料食得。值得一讚係佢個開倒水位冇香港啲咁慳皮,設計好又實淨,將成盒麵180度倒轉,半條麵都冇瀉出嚟,勁!打開個蓋啲麵味湧出嚟,份量比想像中多,感覺真材實料,不愧係日本出品

落滾水到刻線位

出水位個設計好好,香港應該學習吓

開封,啲麵真係好香
之後落醬先係戲肉,嗰包藍色醬汁係糖漿嚟架喎大佬!抱著必死嘅覺悟開包白色醬汁,聞落冇頭先咁嚴重,但唧落去噁心指數要畀10分,灑埋包乾料就大功告成,好想即刻倒落廁所。掙扎完一輪,撈兩嘢放入口,首先襲來一陣老麥熱香餅餐糖漿甜味,夾雜少少鹹味,忽然又食到滑潺潺嘅白色醬汁,然後係脆口嘅士多啤梨乾同白色粒粒(食完到而家都唔知佢咩嚟,忌廉乾?)。同一時間3隻味、4種口感喺口腔內交戰,完全分唔清自己食緊甜品定炒麵。雖則盒麵未至於難食到嘔,但再戰?不了。補充一點:啲白色醬汁唔多夠,食到底得番糖漿同鹹味,劣食層次感會高啲。

先落糖漿…成陣化學甜味攻上鼻

然後係雲呢拿味蛋黃醬

整張超近鏡畀大家睇,係咪好衝擊呢?

加乾料,提高成個麵色彩層次

完成品都幾似封面圖

本著不要浪費食物嘅精神,頂硬上食清光
【仿製狗糧】自製香港山寨加強版
對劣食情有獨鍾嘅巴絲如欲跟機,又無法自己買或請朋友仗義入貨,喺度提供個折衷方案畀你:老麥糖漿+士多啤利新地+淨炒麵王,唔使落晒全部嘅,每樣落少少就夠。劣化糖漿加上人造士多啤梨醬同雲呢拿,衝擊程度比起士多啤梨忌廉蛋糕麵有過之而無不及,試食一啖直頭想嘔。好彩冇乜aftertaste,隻味快來也快去,飲幾啖水走七成,唔似得蛋糕麵咁要飲兩杯茶先散得走一半,如果食完唔記得洗手,隻味留喺手指頭足足一個鐘,感覺幸福美滿。

集齊三樣神器

個樣核突過正版,隻味都係
【預告】一平夜店炒麵朱古力醬2017版
利申,筆者冇自虐傾向,但今個月新出嘅「一平夜店炒麵朱古力醬2017版」將繼續以友情托運方式月底抵港,到時會做死士食多次。筆者曾親身現場睇朋友示範食舊版本,聞到隻味即刻彈開三呎走避,高lv過士多啤梨忌廉蛋糕,有興趣嘅巴絲敬請留意。

相關文章

更多文章

《神奇女俠》預告
巾幗不讓鬚眉

 KS 於 1小時之前發表

DC Comics雖擁有蝙蝠俠、超人等最強漫畫角色,但變為電影版《蝙蝠俠對超人:正義曙光》,卻成功招來無數負評,觀感遠遜於Marvel的超級英雄電影,因此5月30日上映的《神奇女俠...

詳細閱讀

搵唔到最啱你用嘅App?
自己寫隻冇難度

 資料由客戶提供 於 15小時之前發表

你有冇發現有時你有一啲特別需要,想搵隻可以幫到你嘅App,但唔知點解連裝幾隻都冇一隻完全啱你用,有時甚至完全搵唔到啱用嘅App呢?就以日曆App為例,你一上Google Play好...

詳細閱讀

巡邏機械人防止貓咪跳上檯面「掃場」

 航仔 於 16小時之前發表

家中貓大爺經常我行我素,見檯面有杯有碗就掃落地下,令貓奴們防不勝防。最近一款巡邏機械人CatNani出現於眾籌網Indiegogo,機械人會於檯面上「待機」防衛,聲稱以獨門秘技阻止...

詳細閱讀

美國用航拍機唔使再Reg
不過DJI都會限你飛

 KM 於 16小時之前發表

近年流行嘅航拍機雖然係好玩,而基於安全同私穩理由,好多國家同地區都陸陸續續設立相關法例進行規管。但差不多最早設立航拍機登記制嘅美國啱啱就被法院推翻,往後佢地國民要玩航拍機就唔需要再...

詳細閱讀

120Hz屏幕加持
MSI GS73VR 7RF Stealth Pro

 蛇叔 於 18小時之前發表

Gaming Notebook性能固然重要,但打機除咗性能,有時屏幕同喇叭等都會對體驗有所影響,MSI較早前就推出GS73VR 7RF Stealth Pro,賣點係配備120Hz...

詳細閱讀

【包直升機送貨】
Vertu「眼鏡蛇手機」賣279萬

 女漢子 於 18小時之前發表

Vertu手機從來不以規格取勝,靠樣同奢侈用料吸引土豪購買,近日佢哋進駐大陸京東商城,帶來一部鎮店之寶——Signature眼鏡蛇限量版,全球僅發行8部,全中國只售1部,......

詳細閱讀