吃喝玩樂

Jack:有XB1可以一試
冷門《Halo Wars 2》值得玩?

Jack21日之前發表

今次同大家介紹嘅《Halo Wars 2》,可以講係近期一隻冷門作品,唔單只因為佢係Xbox One與PC作品,亦因為佢係近來少見嘅即時策略遊戲,仲要個畫面好靚添喎!
突如其來嘅續作
《Halo Wars 2》係2009年發表嘅《Halo Wars》嘅續作,不過兩者嘅故仔並冇太大關係。回想當年出《Halo Wars》都令我覺得Microsoft真係有Guts,夠膽將一隻RTS(Real Tine Strategic,即時戰略)遊戲放上Console,結果亦一如我預期,敗死收場。死因唔在於遊戲內容(雖然用《Halo》作為主題已注定於亞洲區係唔會有收視),而係在於個操作。當時連《Command & Conquer 3:Tiberium Wars》都有出Console版,同樣都係以慘死作結局,原因就在於呢類型遊戲改於Console上玩真係唔Work。《Halo Wars》推出後,屬於Microsoft子公司嘅開發廠商Ensemble Studios被Microsoft解散,好多人都以為《Halo Wars》唔會有續作。點知於2015年嘅Gamescom,Microsoft宣布推出《Halo Wars 2》,隻Game更由SEGA旗下嘅The Creative Assembly負責製作,343 Industries作支援,沿用返《Halo Wars》嘅RTS玩法,重點係支援Xbox One及PC,唔通微軟真係見過鬼都唔怕黑?

◆ Microsoft力推Xbox One版,仲出埋同捆版Xbox One主機添,但我喺街又唔見有得賣,可能要去啲大型連鎖店先有。
◆ 《Halo Wars 2》以傳統RTS上帝視點進行遊戲,考你統率力同埋應變力。
Console VS. RTS
如果你未接觸過呢個系列作品,或者我用少少時間介紹返。《Halo Wars》就係一隻同《Command & Conquer》或者《StarCraft》系列同類型嘅RTS遊戲,簡單嚟講就係於地圖入面某一個位置建立基地,然後通過收集唔同資源去生產戰鬥單位或者擴展基地功能,而單位本身亦可以用資源去升級能力。到咁上下你可以指揮所屬嘅作戰單位對對手進行攻擊。由於每一種戰鬥單位都有其優劣,而且亦相生相剋,所以要編成混合部隊,或者係人手指派唔同部隊應對唔同敵人。我作為一個《C&C》嘅Fans,玩《Halo Wars 2》時真係好難唔會將兩者拉埋嚟比。操作上,我指PC版,兩隻Game極相近,而我堅係覺得呢類Game根本唔適合用手掣玩,始終手掣嘅按鈕組合點都唔夠鍵盤咁豐富同靈活,再加上有滑鼠及一眾Shortcut嘅幫助,操上係一定係比用手掣快好多,所以如果你係用手掣玩嘅話,我勸你都係唔使上網同人PvP架喇,萬一俾你對住個PC版嘅玩家你真係九成九會輸。
◆ 遊戲入面,所有戰鬥單位都係相生相剋,就好似戰車對人好好用,但當有飛機或重戰車出現就會輸得好快;飛行單位亦都唔係無敵,人仔同埋對空導彈係好有殺傷力。
◆ 透過升級建築,唔單只可以擴展基地嘅能力,仲會開解開戰鬥單位嘅升級。
好靚呀!
其實隻Game有冇故仔架呢?當然係有,個故仔就係以《Halo》系列作為藍本,以星盟同UNSC之間嘅戰爭為主線,另外再加上新嘅外星勢力「Banished」,形成更加大嘅世界觀。如果你冇玩開《Halo》系列咁係唔係可以Skip呢隻Game呢?我會答你唔係,你大可以當佢係一個全世嘅故仔,反正同前作關係又唔算多。我想講成隻Game做得最正一定係佢嘅過場同埋故事交代CG,真係好靚!絕對媲美荷里活級數。




一夫當關真英雄
講到英雄,又令我想起另一隻RTS遊戲《StarCraft II》,點解呢?因為兩者都有英雄呢個戰鬥單位。英雄基本上等於一個中隊嘅實力,唔只單擁有護甲,更有比普通士兵更強嘅防守力及攻擊力,而且唔同英雄都有自己獨特能力,例如有啲就可以騎劫敵人載具據為己用。英雄擁有左右戰區嘅能力,不過單憑一個英雄係冇可能打贏場仗嘅,所以都係好好利用手上資源執好隊兵仲實際。

◆ Master Chief都有登場?
多人模式有驚喜
正如上文所講,《Halo Wars 2》除單人故事外,亦有網上對戰模式。從6人互片、單人對A.I.又或者玩家之間合作攻略都有。另外因應返《Halo》系列保留有Stronghold及Domination呢兩個多人模式,其實即係守住地圖上嘅點咁囉。我反而想講下佢個Blitz模式,呢個模式係用卡牌來玩,簡單嚟講就係將所有元素變晒卡牌,基地係一張卡,唔同資源又會係唔同嘅卡,就連戰鬥單位都係一張張卡,呢個玩法我覺得幾好玩,而且仲有合作及對戰玩法,算唔算一雞兩味?
◆ 除單人模式外,本作仲有幾個唔同玩法嘅多人互片或合作模式等大家嚟挑戰。
◆ Blitz係我覺得幾得意嘅線上玩法,將所有事轉晒做卡片,會燃起你嗰陣儲卡嘅火。
◆ 每張卡都有唔同能力,你可以俾錢買,又或者打唔同Mission打返嚟。
合RTS新手
當初知道由Creative Assembly接手呢隻Game係有啲期望,因為呢個Studio最響朵嘅作品就係《Total War》系列,呢個系列又係RTS遊戲,所以直覺話我知《Halo Wars 2》都會好正。最後出嚟有冇失望?冇,但又未去到令我覺得佢係神作,離完美仲有好遠,不過呢期想玩RTS新Game嘅話,呢隻可以講係唯一選擇,再加上支援Xbox Anywhere,Xbox One與PC通用(懇請大家唔好試Console版,真係唔好玩自己),隻Game亦又唔算大咬,悶悶哋都話絕對可以一試。如果你係RTS新手,咁不妨將本作作為入門,因為本作唔算難玩,操作(PC上)容易順手,係易入口嘅。不過諗返呢個2月及3月,一堆超人氣超待望新Game係咁出,再加多部任天堂Switch新機,究竟仲有幾多人有留意到《Halo Wars 2》都係一個疑問。


SPEC
遊戲開發:Creative Assembly / 343 Industries
遊戲發行:Microsoft Studios
遊戲類型:即時戰略
遊戲平台:PC / Xbox One
遊戲人數:1
遊戲售價:$419(標準版)
     $559(終極版)
推出日期:已推出

相關文章

更多文章

Sony計劃好脫離Marvel電影宇宙?

 航仔 於 8小時之前發表

《蜘蛛俠:強勢回歸》(Spider-Man: Homecoming)預告噚日出爐,坊間反應唔錯,相信好多fans都期望Marvel、迪士尼同Sony合作可以延續落去,據了解目前傾好...

詳細閱讀

風格話抄就抄
Adobe新技術乾坤大挪移

 女漢子 於 11小時之前發表

要改一幅好圖話難唔難,話易唔易,對光線、顏色、接駁位等細節嘅處理缺一不可。Adobe同Cornell University組成嘅聯合團隊開發全新演算法,應用至深度學習程式分析圖片A...

詳細閱讀

DeX?Bixby?
介紹影片破解Galaxy S8「生字」

 女漢子 於 12小時之前發表

Galaxy S8/S8+大玩高屏佔比Infinity Display,去除實體home鍵並且將比例變做18.5:9,採用S835+4GB RAM+64GB ROM,呢啲都係最明顯...

詳細閱讀

早買送多1年保養!
LG G6港行發布

 蛇叔 於 15小時之前發表

LG今日喺香港正式發布全新G6旗艦手機,賣點係改用18:9比例屏幕,而且加入IP68防水同內建Quad DAC,想知香港會賣幾錢同有咩優惠就要留意喇!......

詳細閱讀

無框世代?
Samsung Galaxy S8/S8+

 蛇叔 於 1日之前發表

Samsung剛剛喺美國發布全新Galaxy S8及Galaxy S8+兩款2017年度旗艦手機,賣點係打破邊框限制造出超高屏佔比曲面屏幕,想知更多其他賣點就記得睇埋落去。......

詳細閱讀

N64變身Switch底座
兩代主機合作無間

 航仔 於 1日之前發表

任天堂Switch個底座外形雖然唔錯,但有指佢內層有可能會刮花部機,未必能夠令fans百分百滿意,不過即使冇出現呢個問題,相信都唔會阻擋得到一班fans自製特別版底座,近日Tett...

詳細閱讀