吃喝玩樂

Jack:真係嚇到掟掣!
驚慄Game冷馬《Prey》彈得出?

Jack13日之前發表

自認有返咁上下打機年資嘅話,對於《Prey》呢隻作品應該會覺得耳熟。冇錯,呢隻作品2006年曾經於Xbox 360同埋PC上出過,喂今次呢集是咪續集?咪咁心急先,等我為大家娓娓道來。
《Prey》之前世
2006年隻《Prey》係由Human Head Studios開發,當時隻係都同樣係一隻帶有驚嚇成份嘅FPS作品,當年就只有PC、Xbox 360、Linux、Mac OS X以及Symbian OS等版本。以當時成績來講都唔係差,只不過有玩過嘅香港玩家真係唔多。當時開發商於隻Game出咗冇耐就宣布《Prey 2》嘅開發工作已經在進行。但隨後由於公司買賣同拼購,《Prey 2》嘅擁有權落入Bethesda Softworks及id Software嘅母公司ZeniMax Media手上,但仍然都係由Human Head Studios負責開發工作。繼後成個Project嘅開發就好似跌入Development Hell,不停嘅人事變動令到整個開發進度久久停滯不前。直到2014年10月,當時Bethesda Softworks嘅總裁於澳洲PAX遊戲展入面公布《Prey 2》開發已被中止,理由係「水準不達標」。
◆ 2006年隻《Prey》當時都算叫好叫座
轉生靠嚇
2016年E3,Bethesda Softworks忽然又公布《Prey》嘅Reboot計劃,開發工作轉去Arkane Studios接手(呢個 Studio嘅母公司就係ZeniMax Media),正正就係今次同大家試玩嘅《Prey》喇。好多人都以為呢隻《Prey》即係《Prey 2》,事實並唔係咁。新呢隻《Prey》實情係Reboot作,主要都係基於初代《Prey》,再加上一啲原本喺《Prey 2》入面先有嘅元素,大家當佢係一隻全新嘅作品或者會更好。

故仔講你作為主角,以為身處地球,但後來因為一件事件,發覺原來自己其實身處太空站入面,謎之外星生物正在太空站內大開殺戒,同時你發覺自己並非普通人,在你身後隱藏了一個不為人知嘅計劃。初初睇Trailer,我就已經覺得隻Game好似 《F.E.A.R.》或者係《Dead Space》呢兩個經典驚慄射擊系列。而當我真係玩,我就更加確定我先前呢種想法係冇錯。主角被困喺太空站入面,然後要面對未知外星生物攻擊,又要解謎去開唔同嘅門或者機關籍以逃身,真係好鬼《Dead Space》,而且由於資源唔係十分足夠,尤其遊戲早期,冇咩事真係唔會同嘅外星生物硬碰,有咩都會係「冇咩事我都係走先」咁樣。

◆ 我就覺得《Prey》嘅美術風格同《Dishonored》係有幾分相似
◆ 一開波又係有男女主角俾你揀,初步相信選邊個同個故仔發展係冇任何關係
◆ 謎之外星生物會喺你完全冇為意嘅情況下忽然出現,而且仲會改變形態,移動速度快,一次出四、五隻的話強烈建議你唔好同佢哋糾纏,走為上著!
◆ 總會有唔少屍體出現喺你估唔到嘅地方,就好似呢條鹹魚咁,行過舉頭望到真係俾佢嚇一嚇!
Console版有辣有唔辣
作為一隻FPS作品,槍當然係重點之一,同時間你可以裝備三件武器,通過武器輪可以作出配置及選擇,呢方面同唔少時下流行嘅FPS冇太大分別。而我玩嘅係PS4版,操作上都唔算話有咩問題。通過搜集到升級用嘅元素,就可以幫自己嘅能力升級。同時槍亦可以透過原材料去進行升級。值得一讚係隻 Game 有一個功能係可以將睇嚟完全冇用嘅垃圾如果皮、煙蒂甚至係廢紙等通過回收解體而變成用來升級用嘅原材料,成件事好鬼死環保!所以,一路行一路記得去摷下啲櫃甚至係垃圾桶喇,件件都係寶呀!

整體操作上,我覺得Console版都唔難玩,唯獨Hack入工作站呢一段有啲難搞。武器輪呢個設定唔難明,但好容易會用咗個急救箱;另外有啲地方需要你長按正方掣,但 Call 武器輪就只係按一下正方,所以好多時會按錯,呢方面大家玩時要注意。最後要提一提就係:記得開聲玩,最好帶有環繞聲嘅耳機玩,正到爆呀!
◆ 呢個武器輪嘅系統已經有好多Game用,相信大家都唔會覺得陌生
◆ 經過啲屍體、垃圾桶等記得走埋去Check下有冇嘢執,垃圾都要拎,因為可以回收變成有用嘅升級用素材
◆ 一開始只得呢支泡泡槍,話可以放啲泡出嚟封住啲怪,但我升咗佢級都唔覺好好用,查實係有啲後悔
◆ Hack入工作站其實係一個Mini-Game,用手掣我覺得係難玩,用Mouse應該會易好多
◆ 透過升級自身能力,唔單只可以解開隱藏能力,更可以強化自身體能
總結
好似自《Resident VII:Biohazard》出街之後,呢一期都有幾隻恐怖Game俾大家玩下,同期有《Outlast 2》亦都OK好賣,《Prey》最後都冇叫人失望(或者大家冇咩期望?),要營造出恐怖氣氛,其實都不下幾個要素:出奇不意、不確定、不安全感,只要在環境上花一點時間就可以做到,呢三方面《Prey》真係做到嗰份恐怖感,有幾次我真係嚇到要掟掣兼爆粗,你可以話我細膽,我認呀,咁點吖?玩恐怖Game就係想咁之嘛!


遊戲開發:Arkane Studios
遊戲發行:Bethesda Softworks
遊戲類型:FPS
遊戲平台:PC / PS4 / Xbox One
遊戲人數:1人
遊戲售價:$468
推出日期:已推出
遊戲網頁:https://prey.bethesda.net/cn

相關文章

更多文章

《加勒比海盜:惡靈啟航》
醞釀魔盜王接班人

 KS 於 3小時之前發表

不經不覺,《加勒比海盜》系列原來已拍了14年,連同最新的《加勒比海盜:惡靈啟航》來計,有了5齣作品。未知還有多少「魔盜王迷」尚會誓死追隨系列靈魂人物,即尊尼特普飾演的Captain...

詳細閱讀

好game有好報
《巫師3》今年首季銷量仲高過上年同期

 航仔 於 1日之前發表

一隻好遊戲究竟壽命可以有幾長?波蘭遊戲開發商CD Projekt Red早前公布2017年第一季度財務業績,總收入增長17%,達9930萬波蘭茲羅提,奇就奇在CD Projekt ...

詳細閱讀

X-Men外傳《The New Mutants》行恐怖片路線

 航仔 於 1日之前發表

Marvel超級英雄片雖然娛樂性爆燈,但格局略嫌大路,欠缺驚喜,因此《死侍》、《盧根》等具備另類風格嘅作品至能夠成功跑出,X-Men外傳電影《The New Mutants》更計畫...

詳細閱讀

都係窄邊框
Galaxy Note 8疑似邊框流出

 蛇叔 於 1日之前發表

日前同大家分享過一段懷疑係Galaxy Note 8 Dummy嘅短片,真假就肯定證實唔到,但黑色一舊膠實在較難令人信服,不過今日再有人爆料,唔知今次可信性由有幾高?
......

詳細閱讀

唔止容量多咗咁簡單?
紅米Note 4X高配版

 蛇叔 於 2日之前發表

3月嗰陣小米香港引入紅米Note 4X,雖然規格為佢帶來好評,但有部份人認為3GB RAM+32GB ROM配置始終唔夠用,所以後來香港亦順應民意加推高配版。......

詳細閱讀

Fuze Card:一張智能卡取代30張卡

 航仔 於 2日之前發表

「一卡傍身,世界通行。」 - 呢句出自某大信用卡公司嘅經典宣傳標語,原本Plastc智能信用卡可真正實現,可惜呢個眾籌項目最終以爛尾收場,未竟全功。最近Indiegogo再殺出擁有...

詳細閱讀