Marvel一向對未上映嘅電影橋段相當保密，不過同電影相關產品往往會早過齣戲推出市場，透露戲中部分玄機。Twitter用戶HowlStrange最近分享一系列《Avengers：Endgame》玩具實物照片，展示多個角色喺戲中嘅模樣。

當中《雷神奇俠3：諸神黃昏》首次亮相嘅女戰士Valkyrie仍然穿上《雷神奇俠3》片尾嘅戰鬥服裝，但髮型就有少許改動，同時亦證明Valkyrie將會出場。鷹眼化身成浪人Ronin，之前喺預告內已經現身，但原來浪人連帽裝下仲有個面罩。另外，雷神、Hulk、黑寡婦同火箭浣熊都會穿上復仇者戰鬥服。《Avengers：Endgame》定於4月26日上映。