《生化危機4》電鋸男一出，當年嚇窒咗唔少玩家，經過多年來一眾高手不斷磨練，淨用刀仔KO電鋸男都變到冇難度。不過最近高手Dante Ravioli諗到新招「折磨」電鋸男，就係用踢門嚟殺佢。

唔講唔知，原來玩家踢開門時電鋸男企喺門後面係會被扣血。Ravioli為咗證實呢個傳聞，將電鋸男引到建築物木門後，當聽到電鋸聲臨近就把握時機踢門，然後重複又重複咁踢，由於開頭唔夠熟練，總共花咗大約30分鐘先成功殺死電鋸男。後來Ravioli反覆苦練踢門時機，新紀錄只需14分鐘左右就「踢死」佢。